Agenda a Chofnodion

Ymddiheurodd y Cynghorydd Elizabeth Evans a’r Cynghorydd Dan Potter am na fedrent ddod i’r cyfarfod.

Datgelodd y Cynghorydd Bryan Davies fuddiant personol a buddiant a oedd yn rhagfarnu o ran eitem 3, Fflyd y Cyngor a Gyrru yn y Gwaith – Defnyddio Cerbydau Preifat

Ystyriwyd y ddau bolisi newydd yr oedd y Gwasanaeth Pobl a Threfniadaeth wedi’u datblygu ar y cyd â’r Priffyrdd a’r Gwasanaethau Amgylcheddol. Yn dilyn ystyriaeth gychwynnol gan y Pwyllgor Trosolwg a Chraffu Adnoddau Corfforaethol ar 27 Hydref 2021, ailddrafftiwyd y ddau bolisi hyn i gynnwys nifer o’r newidiadau a awgrymwyd. Ymgynghorwyd gyda’r Undebau Llafur perthnasol am y polisïau hyn a chafodd eu newidiadau nhw eu cynnwys lle bo hynny’n briodol. 

Diben yr holl bolisïau a gweithdrefnau staff oedd nodi’n glir yr ymddygiad, y prosesau a’r gweithdrefnau y mae’n ofynnol i’r staff gadw atynt. Hefyd, roedd y dogfennau hyn yn nodi sut y gall y staff gael cyngor neu gymorth ynghyd â’r canlyniadau o beidio cydymffurfio â’r polisi a/neu’r weithdrefn. 

Polisi Gyrru yn y Gwaith – Fflyd y Cyngor

Cynhaliwyd adolygiad Rheoli Risg Fflyd a Gyrwyr gan ymgynghorydd ar ran Zurich, cwmni yswiriant y Cyngor. Y prif ddiben oedd adolygu polisïau a threfniadau’r Cyngor gan ystyried safonau arfer gorau a darparu argymhellion a fyddai’n cynorthwyo wrth sicrhau cydymffurfiaeth, diogelu ein gweithlu rhag niwed a lleihau risg digwyddiadau. 

Un o brif argymhellion yr Adolygiad oedd cyflwyno Polisi Gyrru yn y Gwaith gyda Chytundeb Gyrrwr yn rhan ohono, sy’n cynnig “disgwyliad diamwys clir ynghylch safonau gyrru”. Roedd y Polisi Gyrru yn y Gwaith – Fflyd y Cyngor yn un o gyfres o gynlluniau sy’n ceisio safoni’r prosesau cofnodi a chydymffurfiaeth ar draws y fflyd cerbydau a sicrhau safonau gyrru sy’n gwella diogelwch y gyrwyr a’r teithwyr, gan leihau nifer y digwyddiadau a’r

damweiniau sy’n gysylltiedig â’r fflyd. Roedd y cynlluniau eraill yn cynnwys cyflwyno modiwl e-ddysgu ar gyfer rhoi hyfforddiant i yrwyr a systemau archwilio cadarn ar gyfer cerbydau a thrwyddedau. 

Cyflwynwyd y canlynol fel rhan o’r Polisi Gyrru yn y Gwaith – Fflyd y Cyngor:-

• Cytundeb Gyrrwr/Gweithredwr Peirianwaith i’w lofnodi bob blwyddyn;
• Y gofyniad i weithwyr hysbysu eu rheolwr o unrhyw newid i’w hiechyd neu namau corfforol/synhwyraidd ac asesiad iechyd blynyddol
• Os oes achos, sgrinio am gyffuriau ac alcohol
• Y gweithiwr yn talu cyfraniad o hyd at £250 at gostau dros-ben yswiriant yn dilyn gweithdrefn ddisgyblu, os achosir y difrod o ganlyniad i’w hesgeulustod nhw neu os byddant wedi bod yn gyrru heb ofal a sylw priodol

Polisi Gyrru yn y Gwaith – Defnyddio Cerbyd Preifat (Fflyd Llwyd)

Roedd y Polisi Gyrru yn y Gwaith – Defnyddio Cerbyd Preifat (Fflyd Llwyd) yn nodi’r disgwyliadau ar y gweithwyr hynny sy’n defnyddio eu cerbyd preifat at ddibenion busnes y Cyngor. Byddai modiwl e-ddysgu hefyd yn cael ei ddatblygu i gyd-fynd â’r polisi. 

Cyflwynwyd y canlynol fel rhan o’r Polisi Gyrru yn y Gwaith – Defnyddio Cerbyd Preifat (Fflyd Llwyd):

• Datganiad defnyddiwr Cerbyd Preifat i’w lofnodi bob blwyddyn;
• Y gofyniad i’r gweithiwr hysbysu eu rheolwr o unrhyw newid i’w hamgylchiadau a allai effeithio ar ddefnyddio cerbyd preifat at ddibenion gwaith
• Os oes achos, sgrinio am gyffuriau ac alcohol
• Y gweithwyr yn cadarnhau bod eu cerbydau yn addas i’r ffordd fawr, bod ganddynt dystysgrif MOT (pan fo hynny’n briodol) a’u bod wedi cael ei yswirio’n  ...  Gweld y cofnodion lawn ar gyfer eitem 3.

Rhoddwyd diweddariad am absenoldeb oherwydd salwch yn dilyn cais gan y Pwyllgor yn y cyfarfod diwethaf. Dywedwyd bod y polisi yn amlinellu’r gweithdrefnau ar gyfer rheoli absenoldeb oherwydd salwch o fewn y Cyngor. O ran y gweithlu corfforaethol, roedd Polisi a Gweithdrefn Rheoli Absenoldeb Oherwydd Salwch yn y Gwaith wedi bod yn weithredol ers hydref 2017. Roedd y prosesau a nodwyd yn y ddogfen wedi'u gweithredu'n llawn ac roeddent bellach wedi'u hen sefydlu.   

O ran gweithlu’r ysgolion, cymeradwyodd y Cabinet Bolisi a Gweithdrefn Enghreifftiol Rheoli Absenoldeb Oherwydd Salwch yn y Gwaith diwygiedig ym mis Rhagfyr 2021 ac roedd y ddogfen hon yn cael ei chynnig i Gyrff Llywodraethol y tymor hwn i'w mabwysiadu. 

Roedd y gweithdrefnau fwy neu lai’r un fath ar gyfer y ddau bolisi.

Dywedwyd bod y gwaith o fonitro absenoldeb oherwydd salwch wedi’i rannu’n ddwy:

a) Absenoldeb tymor byr oherwydd salwch – cyfnod byr o absenoldeb, yn aml dim ond ychydig ddyddiau o ganlyniad i fân anhwylderau

b) Absenoldeb hirdymor oherwydd salwch – absenoldeb parhaus o fwy na 28 diwrnod

Rhoddwyd rhagor o fanylion am y polisi gan gynnwys gwybodaeth am fonitro absenoldeb tymor byr, monitro absenoldeb hirdymor oherwydd salwch, Care First, y Siarter Afiechyd Marwol, Absenoldebau oherwydd Covid-19, a rôl  Swyddog Iechyd a Lles y Gweithwyr.

Rhoddwyd cyflwyniad hefyd am absenoldeb oherwydd salwch a darparwyd y wybodaeth ganlynol:-

• Nifer y staff
• Nifer y diwrnodau a gollwyd
• Nifer y diwrnodau a gollwyd cyfwerth ag amser llawn
• Meincnodi – Nifer y diwrnodau - 2018-19, 2019-20, 2020-21
• Cwmwl Geiriau – Rhesymau dros absenoldebau hirdymor
• Nifer yr atgyfeiriadau Iechyd Galwedigaethol
• Nifer y staff a roddodd orau i’w gwaith oherwydd afiechyd
• Absenoldebau oherwydd Covid-19 hyd at 07/01/2022

Yn dilyn cwestiynau o’r llawr, CYTUNWYD i dderbyn yr adroddiad er gwybodaeth.

Hefyd, wrth gyflwyno data i’r Pwyllgor yn y dyfodol, dywedwyd y dylid ystyried cymharu absenoldebau oherwydd salwch yng Nghyngor Sir Ceredigion â’r sefyllfa yn y sector preifat ac yng Nghyngor Sir Powys.

Ystyriwyd yr adroddiad ynghylch Cysylltedd Digidol. Cyflwynwyd yr adroddiad i roi trosolwg i’r Aelodau o’r cynlluniau a’r prosiectau yr oedd Cyngor Sir Ceredigion yn ymgymryd â nhw i gefnogi lefelau o gysylltedd digidol ar draws y Sir. 

Darparwyd y wybodaeth ganlynol ar ffurf cyflwyniad pwyntbwer:-

·         Cefndir

·         Sefyllfa bresennol – Band eang, ffonau symudol

·         Prosiectau / Cynlluniau cyfredol – Band eang, Prosiectau Ffeibr, Prosiect Gigabit, Adolygiad o’r Farchnad Agored 2021, Ffonau Symudol, Rhwydwaith Gwledig a Rennir , Gwasanaeth Ardal Estynedig, Rhwydwaith LoRaWAN ar draws y Sir, Trefi SMART Ceredigion, Gwefan Ddigidol, Mapio Cysylltedd Digidol

·         Casgliad

Yn dilyn cwestiynau o’r llawr, CYTUNWYD i nodi’r adroddiad diweddaru ynghylch yr agenda cysylltedd digidol yng Ngheredigion a gwaith y Cyngor o ran helpu i wella cysylltedd a chynorthwyo’r Aelodau i godi ymwybyddiaeth a hyrwyddo cyfleoedd o fewn eu cymunedau.

Cytunwyd ar y Flaenraglen Waith fel y’i cyflwynwyd yn amodol ar y canlynol:-

•           Cyflwyno adroddiad am Ffermydd y Sir ynghyd ag argymhellion ynghylch y ffordd ymlaen yng nghyfarfod y Pwyllgor ar 17 Mawrth 2022

•           Gwahodd y Swyddog Digidol newydd i un o gyfarfodydd y dyfodol  

•           Cyflwyno adroddiad ynglŷn â grantiau Trefi Smart a chyllid arall sydd ar gael i adfywio trefi yn un o gyfarfodydd y dyfodol ar ôl yr etholiadau.

CYTUNWYD i gadarnhau cofnodion y cyfarfodydd a gynhaliwyd ar 14 Hydref 2021 a 27 Hydref 2021 yn amodol ar nodi bod y Cynghorydd Endaf Edwards wedi ymddiheuro na fedrai fod yn bresennol yn y cyfarfod a gynhaliwyd ar 27 Hydref 2021.

Materion yn codi

Gofynnodd y Cynghorydd Lyndon Lloyd MBE a fyddai modd cynnwys rhif ffôn CLIC ar ddogfennau ymgynghori a dogfennau cyhoeddus gan nad oedd pawb yn medru ymateb i ymgynghoriadau ar-lein. Byddai’r cais hwn yn cael ei anfon ymlaen at y swyddogion perthnasol.