Eitem Agenda

        Roedd y Gwasanaeth Pobl a Threfniadaeth wedi parhau â’r gwaith o adolygu, datblygu a diweddaru polisïau allweddol. Yn dilyn ymgynghoriad, cafodd y polisïau a’r canllawiau canlynol eu trafod a’u diwygio a bu i’r undebau llafur corfforaethol cydnabyddedig gytuno iddynt:

• Polisi Recriwtio Diogel
• Cynllun Prynu Gwyliau Blynyddol
• Canllawiau Teithio, Cynhaliaeth a Llety

 

Diben pob polisi a gweithdrefn ar gyfer y gweithwyr oedd amlinellu'n glir yr ymddygiad sy'n ofynnol ohonynt ynghyd â'r prosesau a'r gweithdrefnau oedd angen iddynt eu dilyn. Roedd y dogfennau hyn yn cynnwys gwybodaeth ynglŷn â'r cymorth a'r cyngor oedd ar gael ac roedd yn sôn am y canlyniadau o beidio â glynu wrth y polisi a/neu weithdrefn.

 

Polisi Recriwtio Diogel

Roedd y Polisi Recriwtio Diogel yn nodi’r safonau yr oedd Cyngor Sir Ceredigion wedi’u gosod ynghylch recriwtio a chadw pobl sy’n dymuno gweithio gyda grwpiau agored i niwed (plant a/neu oedolion) mewn ffordd ddiogel. Roedd y Polisi cyfredol, a oedd wedi’i gyflwyno yn 2017, wedi’i adolygu i sicrhau ei fod yn parhau i gydymffurfio â’r ddeddfwriaeth a’i fod yn addas i’r diben. Dim ond mân newidiadau oedd wedi’u cynnig, ac roedd y rhain yn cael eu nodi isod. Roedd y newidiadau yn cael eu cyflwyno er mwyn sicrhau proses fetio gadarn a thrylwyr ar gyfer yr holl staff, gwirfoddolwyr a chontractwyr sy’n gweithio i Gyngor Sir Ceredigion neu sy’n gweithio gyda Chyngor Sir Ceredigion.

 

Nid oedd unrhyw newidiadau i’r arfer presennol o gynnal gwiriadau DBS ar ôl i weithwyr gael eu penodi i rolau sy’n cyflawni gweithgarwch a reoleiddir. Dim ond o dan rai amgylchiadau y byddai angen ymgymryd â’r gwaith o ailwirio bob hyn a hyn h.y. pan fyddai’r ddeddfwriaeth yn mynnu bod angen gwneud hynny neu pan fyddai pryder, cwyn neu wybodaeth yn dod i law ynghylch euogfarn neu rybudd a roddwyd i weithiwr mewn rôl sy’n cyflawni gweithgarwch a reoleiddir.

 

Roedd y newidiadau arfaethedig i’r Polisi fel a ganlyn:

• Diwygiadau i’r ddogfen am nad yw’r Cyngor yn gorff cofrestredig mwyach. Bellach, cynhelir yr holl wiriadau DBS ar-lein mewn cytundeb â Chyngor Sir Powys fel y corff cofrestredig.
• Eglurder pellach am wiriadau fetio/sgrinio cyn cyflogaeth
• Ail-fformatio’r polisi gan ddarparu adran ar wahân ynghylch y Gwasanaeth Datgelu a Gwahardd a symud adrannau o’r prif adroddiad i’r atodiadau.
• Mwy o eglurder ynghylch cludadwyedd gwiriadau DBS
• Cael gwared â’r cyfeiriad at y diffiniad a oedd yn bodoli cyn 2012 o weithgarwch a reoleiddir.

 

Yn ogystal ag ymgynghori â’r undebau llafur, roedd Bwrdd Diogelu Corfforaethol y Cyngor wedi adolygu’r polisi.

 

Cynllun Prynu Gwyliau Blynyddol

Trefniadau gwirfoddol oedd Cynlluniau Prynu Gwyliau Blynyddol a oedd yn cynnig mwy o hyblygrwydd i weithwyr dros eu hawl i gael gwyliau trwy ganiatáu iddynt brynu gwyliau ychwanegol o dan drefniant ad-dalu cyflog. Roedd y cynlluniau hyn i’w gweld yn eang ar draws sefydliadau yn y sector cyhoeddus a’r sector preifat.

Byddai’r cynllun yn cynnig arbedion i’r Cyngor am na fyddai dim costau cyflog ar gyfer cyfnod y gwyliau blynyddol ychwanegol ac y byddai gostyngiad yng nghyfraniadau Yswiriant Gwladol y Cyflogwr. Un o’r buddion i’r gweithiwr fyddai’r cyfle i wasgaru cost absenoldeb di-dâl dros gyfnod o hyd at 12 mis.

 

Dyma grynodeb o amodau’r cynllun:

• Uchafswm y gwyliau ychwanegol y byddai modd i weithwyr eu prynu fyddai dwywaith eu horiau cytundebol wythnosol
• Byddai’r ceisiadau yn cael eu cymeradwyo gan y Swyddog Arweiniol Corfforaethol.
• Mae’r Cyngor yn cadw’r hawl i wrthod cais os penderfynir y byddai hyn yn cael effaith niweidiol ar y gwasanaeth a ddarperir. Nid oes hawl i apelio.
• Mae modd gwneud ceisiadau trwy gydol y flwyddyn gwyliau blynyddol tan 31 Mai. Os cânt eu cymeradwyo, caiff didyniadau cyflog eu cyfrifo ar sail nifer y misoedd sy’n weddill yn y flwyddyn gwyliau blynyddol.
• Anogir gweithwyr i archebu eu gwyliau blynyddol yn y lle cyntaf.
• Os caiff ei gymeradwyo, caiff y Cynllun Prynu Gwyliau Blynyddol ei gynnwys yn y Polisi Gwyliau ac Absenoldebau, a gymeradwywyd gan y Cabinet ar 3 Mehefin 2024.

 

 

Canllawiau Teithio, Cynhaliaeth a Llety

Cafodd y canllaw i weithwyr mewn perthynas â theithio a chynhaliaeth ei ddiweddaru ddiwethaf yn 2015. Fel rhan o’r broses adolygu, ceisiwyd cyngor gan ymgynghorwyr treth y Cyngor er mwyn sicrhau bod y ddogfen derfynol yn cydymffurfio â rheoliadau Cyllid a Thollau EF.

 

Roedd y canllawiau diwygiedig yn nodi’r amgylchiadau a fyddai’n caniatáu i weithwyr a oedd yn cyflawni gwaith ar ran y Cyngor (a oedd wedi’i gymeradwyo gan y Cyngor) gyflwyno hawliadau am gostau teithio megis lwfansau milltiroedd, treuliau tanwydd, trafnidiaeth gyhoeddus, cynhaliaeth neu gostau llety.

 

Rhaid ystyried y dull trafnidiaeth mwyaf economaidd bob amser.

 

Roedd y newidiadau arfaethedig i’r Canllawiau fel a ganlyn:

·       Gwaredu’r “Lwfans te” a dalwyd yn flaenorol am absenoldebau o dros 4 awr                 i gynnwys rhwng 3pm a 6pm

·       Cynyddu’r trothwy uchaf am lety dros nos o £150 i £200 yn Llundain ac o £95 i £120 mewn mannau y tu allan i Lundain. Dylid archebu pob llety dros nos trwy Dîm Caffael y Cyngor. Nid oedd lefel wedi cael ei phennu gan CThEF ar gyfer llety dros nos ac roedd y cynnig i gynyddu’r trothwy yn cael ei gyflwyno yn dilyn gwaith a wnaethpwyd i ddadansoddi’r prisiau presennol ar gyfer llety yn Llundain a thu allan i Lundain.

 

Yn dilyn trafodaeth a chwestiynau o’r llawr, CYTUNWYD i argymell y canlynol i’r Cabinet:-

·       Polisi Recriwtio Diogel

·       Cynllun Prynu Gwyliau Blynyddol

·       Canllawiau Teithio, Cynhaliaeth a Llety