Eitem Agenda

Rhoddwyd ystyriaeth i’r Adroddiad ar Anghenion Dysgu Ychwanegol.  Dywedwyd bod y cod newydd ar gyfer Anghenion Dysgu Ychwanegol yng Nghymru wedi ei gyhoeddi ym mis Mawrth 2021, gyda’r bwriad o roi’r system newydd ar waith o fis Medi 2021.  Fodd bynnag, roedd y rhaglen weithredu wedi’i hadolygu oherwydd effaith y pandemig. 

Rhoddwyd gwybodaeth gefndir fanwl i’r strategaeth a chyflwynwyd nod yr ymagwedd newydd fel y mae wedi ei nodi yn y Cod.   

Adroddwyd bod y cynllun gweithredu  wedi ei adolygu ymhellach gan y Gweinidog ym mis Gorffennaf 2021, oherwydd effaith sylweddol y pandemig. 

O’r 1af o Fedi 2021, byddai’r system ADY yn dechrau ar gyfer plant o oedran ysgol gorfodol ac is yn unig:

 • sydd newydd eu nodi fel rhai sydd ag angen dysgu ychwanegol (ADY) yn dilyn prosesau Cod ADY, waeth beth fo'u lleoliad - gan gynnwys y rhai sydd o bosibl yn cael darpariaeth ysgol heblaw yn yr ysgol (EOTAS), y sawl sydd mewn ysgol annibynnol neu sy'n derbyn addysg ddewisol yn y cartref;

 • yn cael eu cadw;

O’r 1af o Ionawr 2022, byddai’r system ADY yn dechrau ar gyfer plant o oedran ysgol gorfodol ac yn is sydd:

• yn mynychu ysgolion a gynhelir (gan gynnwys Unedau Cyfeirio Disgyblion) ac sydd ym Mlynyddoedd Meithrin 1 a 2 a Blwyddyn 1, Blwyddyn 3, Blwyddyn 5, Blwyddyn 7 a Blwyddyn 10) sydd â darpariaeth addysgol arbennig drwy weithredu yn y blynyddoedd cynnar / gweithredu blynyddoedd cynnar a mwy neu weithredu gan yr ysgol GY / gweithredu gan yr ysgol â mwy GYM;

 • Ni fyddai plant sydd â darpariaeth addysgol arbennig ar hyn o bryd drwy ddatganiad, yn aros am asesiad AAA neu wrthi'n cael asesiad AAA; na’r rhai sydd dros oedran ysgol gorfodol yn cael eu cynnwys yn y flwyddyn gyntaf o weithredu.

• Byddai’r broses o symud plant i'r system newydd yn cael ei gwasgaru dros y flwyddyn.

• Ni fyddai rhieni'n gallu gofyn am symud i'r system newydd tan y 1af o Ionawr 2022

Nodwyd bod yr Awdurdodau Lleol yn dal i aros am y canllawiau gweithredu tair blynedd terfynol.  Disgwylir i’r canllawiau gael eu cyhoeddi yn gynnar yn Nhymor yr Hydref.  Roedd y ffaith bod oedi o ran y canllaw hwn yn effeithio ar sicrwydd y cyngor yr oeddem  yn gallu  ei gynnig i ysgolion, yn ogystal ag effeithio ar y gwaith paratoi yr oeddem yn gallu ei wneud gyda rhieni ac asiantaethau cymorth.

O dan y system ADY newydd, roedd dyletswydd ar awdurdodau lleol i adolygu'r trefniadau a wnaed gan ysgolion i ddiwallu anghenion dysgwyr ag ADY. Byddai’r canllawiau hyn yn amlinellu egwyddorion a disgwyliadau Awdurdod Ceredigion ar gyfer addysgu plant a phobl ifanc ag Anghenion Dysgu Ychwanegol. Roedd hefyd yn rhoi eglurder ar yr hyn a ddisgwylir gan ysgolion prif ffrwd Ceredigion, o ran diwallu anghenion dysgwyr ag ADY, a byddai’r awdurdod yn ei adolygu. Byddai’r ddogfen hon yn rhan annatod o fframwaith yr awdurdod ar gyfer diwallu anghenion pob plentyn a pherson ifanc rhwng 0 a 25 oed.

Roedd Ceredigion eisoes mewn sefyllfa dda i weithredu llawer o egwyddorion y diwygiadau ADY newydd a darparwyd rhestr o’r rhain.   Darparwyd rhestr hefyd o’r risgiau a nodwyd yn sgil y newidiadau hyn. 

Byddai’r system ADY newydd yn gweithredu ochr yn ochr â'r system AAA, yn ystod y cyfnod gweithredu tair blynedd. Byddai adolygiad o'r cynllun gweithredu a'r ddogfen egwyddorion a disgwyliadau yn cael ei darparu, unwaith y byddai’r cynllun gweithredu terfynol a'r wybodaeth wedi'u cadarnhau gan Lywodraeth Cymru.

Byddai dogfen Egwyddorion a Disgwyliadau Ceredigion yn cael ei chyflwyno i’r Cabinet maes o law.  Cododd Aelodau bryderon hefyd ynglŷn â’r ffaith bod Llywodraeth Cymru  wedi nodi y byddai rhoi’r newidiadau hyn ar waith yn gost niwtral, fodd bynnag nid dyna oedd yr achos oherwydd yr adnoddau ychwanegol y byddai eu hangen.  

CYTUNWYD i nodi’r sefyllfa bresennol a diolch i swyddogion am eu gwaith yn rhoi’r cod hwn ar waith.