Agenda a Chofnodion

Dechreuwyd y cyfarfod drwy weddi gan yr Athro John Tudno Williams. 

Yn absenoldeb y Cadeirydd bu i’r Athro John Tudno Williams gadeirio’r cyfarfod ar y cychwyn. 

Bu i’r Cadeirydd fynegi cydymdeimladau’r pwyllgor â’r Athro Catrin Williams ar farwolaeth ei thad yn ddiweddar.

Derbyniwyd ymddiheuriadau oddi wrth y Cynghorydd Lyndon Lloyd MBE, Y Parchedig Mark Ansell a’r Parchedig Wyn Thomas am iddynt fethu â bod yn bresennol yn y cyfarfod.

CYTUNWYD i gadarnhau Cofnodion Cyfarfod y Cyngor Ymgynghorol Sefydlog ar Addysg Grefyddol a gynhaliwyd ar 12 Chwefror 2021.

Materion yn codi

Cofnod 6 (b) Aelodaeth o’r Pwyllgor - Bu i’r Cadeirydd groesawu Anna Uruska fel cynrychiolydd yr Eglwys Gatholig i’w chyfarfod cyntaf.

Roedd y Parchedig Wyn Thomas hefyd wedi derbyn y gwahoddiad i ymuno â’r pwyllgor, fodd bynnag nid oedd yn bosib iddo fod yn bresennol yn y cyfarfod hwn a bu i’r clerc ymddiheuro iddo dderbyn yr agenda’n hwyr.

Ymgynghoriad Llywodraeth Cymru ar ganllaw Crefydd, Gwerthoedd a Moeseg

Ystyriwyd y ddogfen ymgynghori o ran Canllaw Crefydd, Gwerthoedd a Moeseg. Yn dilyn sylwadau oddi wrth Aelodau cytunwyd y bydd y Rheolwr Corfforaethol - Gwella Ysgolion, Gwasanaethau Ysgolion yn coladu sylwadau a’u dosbarthu er ystyriaeth Aelodau cyn eu cyflwyno i Lywodraeth Cymru yn unol â’r hyn a nodwyd ynghlwm  yn Atodiad 1. .  

Yn dilyn sylwadau a gyflwynwyd i’r Rheolwr Corfforaethol - Gwella Ysgolion, Gwasanaethau Ysgolion gan Aelodau diwygiwyd yr ymateb caiff ei anfon at Llywodraeth Cymru  yn unol â’r hyn a nodwyd yn Atodiad 2.