Agenda a chofnodion drafft

a)     Ymddiheurodd y Cynghorwyr Gwyn James a Caryl Roberts am eu hanallu i fynychu’r cyfarfod gan neu bod ar ddyletswydd arall ar ran y Cyngor;

b)     Ymddiheurodd y Cynghorwyr Euros Davies, Gareth Lewis a Carl Worrall am eu hanallu i fynychu’r cyfarfod;

c)     Ymddiheurodd James Starbuck, Cyfarwyddwr Corfforaethol am ei anallu i fynychu’r cyfarfod.

a)    Datgelodd Cadeirydd y Cyngor fuddiant personol ar ran yr holl Gynghorwyr mewn perthynas ag eitem 5 ac eitem 8 isod;

b)    Datgelodd y Cynghorydd Matthew Vaux fuddiant personol ac un sy’n rhagfarnu mewn perthynas ag eitem 5 isod gan adael y cyfarfod yn ystod y trafodaethau;

c)    Datgelodd y Cynghorwyr Keith Evans, Bryan Davies, Catrin M S Davies, Meirion Davies, Amanda Edwards, Endaf Edwards, Eryl Evans, Gwyn Wigley Evans, Rhodri Evans, Wyn Evans, Chris James, Gareth Lloyd a Sian Maehrlein fuddiant personol mewn perthynas ag eitem 5 isod gan nodi eu bod wedi derbyn gollyngiad i siarad ac i bleidleisio ar y mater hwn;

d)    Datgelodd y Cynghorwyr Bryan Davies, Endaf Edwards, Rhodri Evans, Chris James a John Roberts fuddiant personol ac un sy’n rhagfarnu mewn perthynas ag eitem 9 isod gan adael y cyfarfod yn ystod y trafodaethau;

e)    Datgelodd y Cynghorwyr Bryan Davies, Gareth Davies, Endaf Edwards, Wyn Evans a Keith Henson fuddiant personol ac un sy’n rhagfarnu mewn perthynas ag eitem 10 isod gan adael y cyfarfod yn ystod y trafodaethau;

f)     Datgelodd Lowri Edwards, Swyddog Arweiniol Corfforaethol, Gwasanaethau Democrataidd fuddiant personol ac un sy’n rhagfarnu mewn perthynas ag eitem 5 isod gan adael y cyfarfod yn ystod y trafodaethau;

g)      Datgelodd Eifion Evans, Y Prif Weithredwr fuddiant personol ac un sy’n rhagfarnu mewn perthynas ag eitem 9 isod gan adael y cyfarfod yn ystod y trafodaethau;

h)    Datganodd y Prif Weithredwr, ar ran yr holl Uwch Swyddogion a oedd yn bresennol, fuddiant personol a buddiant sy’n rhagfarnu mewn perthynas â chofnod 10 isod, yn unol â’r Cod Ymddygiad ar gyfer Gweithwyr Llywodraeth Leol. Gadawodd yr aelodau hynny o staff y cyfarfod yn ystod y trafodaethau. Arhosodd Liz Merriman, Rheolwr Corfforaethol Pobl a Threfniadaeth; Patricia Armstrong, Rheolwr Corfforaethol y Gyfraith a Llywodraethu a Dirprwy Swyddog Monitro; y swyddog a oedd yn cymryd cofnodion, a’r cyfieithydd yn y cyfarfod yn ystod y trafodaethau.

Llongyfarchodd y Cynghorydd Keith Evans, Cadeirydd y Cyngor, y canlynol:

 a)    Gwasg Gomer ar ennill Teitl Argraffydd Llyfrau’r Flwyddyn;

b)    Lois Jones ar gael ei dewis i fod yn rhan o Dîm Rygbi Merched dan 18 Cymru, ac ennill ei chap cyntaf yn erbyn yr Eidal;

c)     Yr Harbourmaster, Aberaeron ar gael ei enwi’n Westy’r Flwyddyn yng Nghymru yn rhestr 100 o’r lleoedd gorau i aros yn y DU gan The Times ar gyfer 2025;

d)    Neuadd Ynys Hir ar gynnal eu dwy seren Michelin am y drydedd flwyddyn yn olynol;

e)   Y Talbot yn Nhregaron sydd wedi cyrraedd rownd derfynol Gwobrau Twristiaeth Cymru.

Estynnodd y Cadeirydd ei gydymdeimlad â theulu a ffrindiau John Emrys Jones yn eu profedigaeth ddiweddar.

PENDERFYNWYD cadarnhau cofnodion cyfarfodydd y Cyngor a gynhaliwyd ar 3 Mawrth 2025 fel rhai cywir.

Materion yn codi

Nid oedd unrhyw faterion yn codi.

Mae Cyngor Sir Ceredigion yn galw ar Brif Weinidog Prydain, Sir Keir Starmer a'r Canghellor Rachel Reeves i ail ystyried y penderfyniadau ariannol maent wedi gwneud parthed y materion islaw:

o   Diddymu lwfans ynni i nifer o henoed y Sir, a fydd yn cael effaith sylweddol ar eu hiechyd a'u lles, ac mi  fyddant yn ei chael hi'n anodd cynhesu eu cartrefi heddiw ac i’r dyfodol yn dilyn y penderfyniad hwn.

o   Newidiadau i Dreth Etifeddiaeth mae'r Canghellor yn cyflwyno sydd yn mynd i fod yn andwyol i nifer o amaethwyr a busnesau Ceredigion. Ni ddylid newid y drefn bresennol ar yr isod:

            Rhyddhad Eiddo Amaethyddol (APR) a Rhyddhad Eiddo Busnes (BPR)

• Y cynnydd yn y Dreth Yswiriant Cenedlaethol ond yn ogystal â hyn,  gostwng y trothwy cychwynnol ar yr un pryd. Bydd y penderfyniadau hyn yn cael effaith andwyol ar gyflogaeth ac yn cael effaith sylweddol ar y gost o redeg busnes.

Yn cynnig:     Cynghorydd Wyn Evans

Yn eilio:        Cynghorydd Rhodri Evans

Gadawodd y Cynghorydd Matthew Vaux, a Lowri Edwards, Swyddog Arweiniol Corfforaethol: Gwasanathau Democrataidd y cyfarfod yn ystod y trafodaethau.

Yn cynnig: Cynghorydd Wyn Evans

Yn eilio: Cynghorydd Rhodri Evans

Mae Cyngor Sir Ceredigion yn galw ar Brif Weinidog Prydain, Sir Keir Starmer a'r Canghellor Rachel Reeves i ail ystyried y penderfyniadau ariannol maent wedi gwneud parthed y materion islaw:

1. Diddymu lwfans ynni i nifer o henoed y Sir, a fydd yn cael effaith sylweddol ar eu hiechyd a'u lles, ac mi  fyddant yn ei chael hi'n anodd cynhesu eu cartrefi heddiw ac i’r dyfodol yn dilyn y penderfyniad hwn.

2. Newidiadau i Dreth Etifeddiaeth mae'r Canghellor yn cyflwyno sydd yn mynd i fod yn andwyol i nifer o amaethwyr a busnesau Ceredigion. Ni ddylid newid y drefn bresennol ar y Rhyddhad Eiddo Amaethyddol (APR) a Rhyddhad Eiddo Busnes (BPR)
3. Y cynnydd yn y Dreth Yswiriant Cenedlaethol ond yn ogystal â hyn,  gostwng y trothwy cychwynnol ar yr un pryd. Bydd y penderfyniadau hyn yn cael effaith andwyol ar gyflogaeth ac yn cael effaith sylweddol ar y gost o redeg busnes.

Rhoddodd y Cynghorydd Wyn Evans grynodeb o’r Rhybudd Gynnig uchod, gan nodi bod penderfyniad Llywodraeth y DU mewn perthynas â’r Lwfans Tanwydd Gaeaf yn rhoi pwysau ariannol ar y rhai lleiaf ffodus, ac o ganlyniad yn cael effaith ar y gwasanaethau a ddarperir gan awdurdodau lleol. Nododd hefyd fod nifer sylweddol o drigolion Ceredigion yn perthyn i’r categori hwn.

Nododd fod y trothwy treth etifeddiaeth amaethyddol yn rhy isel o lawer ac y byddai hyn yn cael effaith sylweddol ar y genhedlaeth nesaf, gan nodi bod fferm o 100 erw heb unrhyw adeiladau yng ngogledd y sir wedi’i gwerthu’n ddiweddar am £1.4 miliwn, ac mae fferm arall 192 erw sy’n cael ei hysbysebu ar werth am bris canllaw o £2.4 miliwn.

Nododd hefyd y byddai'r newidiadau i gyfraniadau Yswiriant Gwladol Cyflogwyr yn effeithio ar nifer o fusnesau sy'n cyflogi pobl yng Ngheredigion a fyddai’n arwain at gynnydd mewn costau gwasanaethau a deunyddiau traul, a fyddai’n gorfod cael eu trosglwyddo i’r defnyddwyr. Yn ogystal, mae sawl busnes wedi penderfynu lleihau'r gweithlu, a bydd hyn yn cael effaith bellach ar y gymuned a'r bobl ifanc sy'n dymuno aros yn yr ardal.

Eiliodd y Cynghorydd Rhodri Evans y cynnig, gan ddiolch i Undebau Amaethwyr am eu llythyrau o gefnogaeth. Cyfeiriodd hefyd at yr effaith y byddai'r newidiadau i'r Lwfans Tanwydd y Gaeaf yn ei chael ar aelodau mwyaf agored i niwed y gymdeithas a phryderon ynghylch tlodi gwledig yng Ngheredigion. Nododd hefyd fod nifer o drigolion wedi cysylltu ag ef sy'n pryderu na fyddai busnesau bach a ffermydd yn gallu fforddio'r dreth etifeddiant ac y byddai'n rhaid iddynt werthu a fyddai'n chwalu cymeriad ac economi leol Ceredigion. Cynigiodd y dylai’r llythyrau gan Undebau’r Amaethwyr gael eu cynnwys yn yr ohebiaeth i Lywodraeth y DU.

Nododd y Cynghorydd Bryan Davies, Arweinydd y Cyngor fod pris da byw yn gymharol uchel ar hyn o bryd oherwydd y gostyngiad mewn cynhyrchu a gwerthu ffermydd. Fodd bynnag,  ...  Gweld y cofnodion lawn ar gyfer eitem 5.

Cyflwynodd y Cynghorydd Matthew Vaux, Aelod Cabinet dros Bartneriaethau, Gwasanaethau Tai, Cyfreithiol a Llywodraethu a Diogelu’r Cyhoedd, yr adroddiad i’r Cyngor gan nodi bod Deddf Gamblo 2005 yn ei gwneud yn ofynnol i bob Awdurdod Trwyddedu adnewyddu eu Datganiad bob 3 blynedd gan gynnwys ymgynghoriad statudol. Nododd fod y Comisiwn Gamblo ar hyn o bryd yn cynnal adolygiad o'r Cod Ymarfer Cyfrifoldeb Cymdeithasol, ac wedi cynghori Awdurdodau Lleol i fwrw ymlaen â’u polisïau diwygiedig yn ystod yr adolygiad.

Nododd y byddai angen i'r Cyngor ystyried hefyd os yw'n dymuno parhau â'r penderfyniad i beidio â chael casino o fewn y Sir, a fyddai wedyn yn cael ei fewnosod yn y Polisi Gamblo diwygiedig.

Nododd hefyd fod ymgynghoriad wedi’i gynnal rhwng 25 Hydref 2024 a 20 Rhagfyr 2024, a arweiniodd at 8 ymateb, chwech ohonynt gan drigolion Ceredigion. Nododd dau o’r ymatebion y dylid ystyried newid ‘meddwl 21’ i ‘meddwl 25’. Cadarnhawyd hefyd y byddai'r polisi yn cael ei adolygu ymhellach pan fydd y Ddeddf Gamblo newydd yn cael ei chyhoeddi.

Diolchodd y Cynghorydd Bryan Davies, Arweinydd y Cyngor, i'r Pwyllgor Trwyddedu am eu gwaith yn adolygu'r polisi diwygiedig, gan nodi eu bod wedi argymell cynnwys argymhelliad ychwanegol a oedd yn argymell bod y Gwasanaeth Diogelu'r Cyhoedd yn anfon taflen i wahanol Glybiau Chwaraeon yng Ngheredigion yn tynnu sylw at y materion sy’n dod gyda Gamblo.

Yn dilyn trafodaeth, PENDERFYNWYD yn unfrydol bod y Cyngor yn:

a)    dilyn yr argymhelliad a wnaethpwyd gan Cabinet i gadw’r penderfyniad “Dim Casinos” yr Awdurdod a bod y penderfyniad yn cael ei gofnodi a’i ychwanegu at y polisi terfynol, a

b)    yn cymeradwyo'r Datganiad Polisi Gamblo diwygiedig fel y Datganiad o Bolisi Gamblo ar gyfer  Ceredigion am y cyfnod 2025-2028.

c)     cymeradwyo'r argymhelliad gan y Pwyllgor Trwyddedu a gynhaliwyd ar 19 Chwefror 2025 bod taflen yn cael ei hanfon at wahanol Glybiau Chwaraeon yng Ngheredigion, yn tynnu sylw at y materion sy'n codi o ran Gamblo, i'w dosbarthu i'w defnyddwyr.

Cyflwynodd y Cynghorydd Matthew Vaux, Aelod Cabinet dros Bartneriaethau, Gwasanaethau Tai, Cyfreithiol a Llywodraethu a Diogelu’r Cyhoedd, yr adroddiad i’r Cyngor sy'n amlinellu'r diwygiadau i'r Polisi Diwygiedig Tacsis a Cherbydau Hurio Preifat 2025.

Nododd y gofyniad ar gyfer gyrwyr a oedd yn cynnwys ymuno â'r cynllun Diweddaru'r Gwasanaeth Datgelu a Gwahardd a fyddai'n cael ei wirio bob 6 mis; ychwanegu gwiriadau troseddol tramor; mabwysiadu Cod Ymddygiad Gyrwyr a Chod Gwisg Gyrwyr Llywodraeth Cymru; diweddaru'r Amodau Gyrwyr yn unol ag Argymhellion Llywodraeth Cymru a mabwysiadu'r "Prawf Addas a Phriodol".

Byddai'n ofynnol i berchnogion cerbydau gael gwiriad blynyddol o'r Gwasanaeth Datgelu a Gwahardd, ac i fodloni'r "Prawf Addas a Phriodol". Byddai gosod camerâu CCTV a System Fideo ‘Pwynt Taro’ (Dash Cams) yn wirfoddol, fodd bynnag, rhaid i yrwyr neu weithredwyr sy'n dewis gosod offer o'r fath gydymffurfio â'r amodau a nodir gan Lywodraeth Cymru. Byddai argymhellion Llywodraeth Cymru ar gyfer amodau hygyrchedd ar gerbydau hefyd yn berthnasol.  Byddai'r "Prawf Addas a Phriodol" hefyd yn berthnasol i weithredwyr a pherchnogion cerbydau, yn ogystal â'r Amodau Gweithredwyr diwygiedig yn unol ag argymhellion Llywodraeth Cymru.

Nododd hefyd na fyddai’r Awdurdod Trwyddedu yn adnewyddu unrhyw drwydded i ddefnyddio cerbyd fel cerbyd hacni neu gerbyd llogi preifat os yw’r cerbyd perthnasol wedi’i raddio fel cerbyd Categori A, Categori B, Categori C, Categori D neu Gategori S wedi’i drwsio (dirymwyd at ddibenion yswiriant) ar ôl y dyddiad y trwyddedwyd y cerbyd gyntaf gan y Cyngor. Fodd bynnag, gall cerbydau sydd wedi’u graddio fel cerbydau Categori N wedi'u trwsio (dirymwyd at ddibenion yswiriant) gael eu hail-drwyddedu ar yr amod bod yr ymgeisydd neu’r perchennog wedi darparu adroddiad peiriannydd priodol (wedi’i gymeradwyo gan yr Awdurdod Trwyddedu) sy’n cadarnhau safon y trwsio.

Nododd y Cynghorydd Matthew Vaux fod ymgynghoriad wedi'i gynnal rhwng 22 Hydref a 27 Rhagfyr 2024, ac er gwaethaf cysylltu â 319 o unigolion / sefydliadau neu wasanaethau gan gynnwys ymgyngoreion gorfodol a phostio'r wybodaeth ar wefan y Cyngor, dim ond chwe ymateb i'r ymgynghoriad a dderbyniwyd. Nododd hefyd fod Llywodraeth Cymru wedi diweddaru ei chanllawiau ar ddefnyddio CCTV mewn tacsis a cherbydau hurio wrth i’r ymgynghoriad fynd yn fyw, gan ddarparu templed i gynghorau ei ddefnyddio wrth greu polisi CCTV er mwyn helpu i wella unffurfiaeth ledled Cymru.

Nododd y Cynghorydd Bryan Davies, Arweinydd y Cyngor, mai dogfen bwysig yw hon sy’n dangos ymrwymiad y Cyngor i sicrhau diogelwch y cyhoedd wrth ddiogelu’r bobl fwyaf agored i niwed ac yn hyrwyddo’r economi leol, wrth sicrhau unffurfiaeth ledled Cymru.

Yn dilyn trafodaeth, PENDERFYNWYD cymeradwyo'r newidiadau yn y Polisi diwygiedig ar gyfer Cerbydau Hacni (Tacsi) a Cherbydau Hurio Preifat, Gyrwyr a Gweithredwyr, a mabwysiadu'r polisi.

Cyflwynodd y Cynghorydd Bryan Davies, Arweinydd ac Aelod Cabinet ar gyfer Gwasanaethau Democrataidd, Polisi a Pherfformiad a Phobl a Threfniadaeth, yr adroddiad i’r Cyngor yn nodi bod y penderfyniadau sy’n ymwneud â chydnabyddiaeth ariannol yn cael eu gwneud gan Banel Annibynnol Cymru ar Gydnabyddiaeth Ariannol, nad yw o fewn rheolaeth y Cyngor, ac y dylai unrhyw Aelod sy'n dymuno hepgor eu tâl gysylltu â'r Swyddog Arweiniol Corfforaethol ar gyfer Gwasanaethau Democrataidd yn ysgrifenedig. Nododd hefyd fod Cymdeithas Llywodraeth Leol Cymru o blaid y dull hwn o bennu lwfansau’r Aelodau, gan nodi, er gwaethaf beirniadaeth, nad oedd sawl Aelod yn hawlio unrhyw dreuliau, ond bod hyn yn benderfyniad personol i bob Aelod unigol.

Nododd y byddai ychwanegu canllawiau sy'n ymwneud ag absenoldeb teulu ac absenoldeb salwch tymor hir yn dileu'r angen i ystyried materion unigol, neu i enwi unrhyw unigolion.

Yn dilyn pleidlais, PENDERFYNWYD yn unfrydol i gymeradwy’r canlynol:

1. Parhau â’r arfer presennol o beidio â thalu costau teithio wrth gyflawni dyletswyddau yn yr etholaeth;
2. Cymeradwyo bod y lwfansau teithio, cynhaliaeth, llety dros nos a pharcio ceir yn 2025/26 yn parhau ar yr un lefelau ag yr oeddent yn 2024/25;
3. Parhau â’r cynllun lwfans misol y gellir optio i mewn iddo gydag uchafswm o £10 i dalu am gostau ffôn, band eang a phostio;
4. Adlewyrchu talu’r lwfans hwn yn y Datganiad Taliadau blynyddol a wneir i Aelodau;
5. Pan fydd absenoldeb salwch teuluol neu absenoldeb salwch hirdymor yn digwydd yn y dyfodol ar gyfer ddeiliad uwch gyflog, bod y Swyddog Arweiniol Corfforaethol: Gwasanaethau Democrataidd, yn gwneud trefniadau i sicrhau bod dirprwy cyflogedig yn cael ei benodi dros gyfnod yr absenoldeb salwch teulu neu salwch hirdymor. Bydd y Swyddog Arweiniol Corfforaethol: Gwasanaethau Democrataidd hefyd yn diwygio Rhestr Cydnabyddiaeth Ariannol Aelodau ac yn hysbysu'r IRPW yn unol â hynny.
6. Talu ffioedd i Aelodau Cyfetholedig yn amodol ar uchafswm cyfwerth â 10 diwrnod llawn ar gyfer pob pwyllgor y cafodd unigolyn ei gyfethol iddo;
7. Parhau i gyhoeddi cyfanswm y swm a ad-dalwyd gan yr awdurdod yn ystod y flwyddyn heb ei bennu’n benodol i unrhyw Aelod a enwyd o ran y costau gofal a ad-dalwyd;
8. Rhestr Cydnabyddiaeth Ariannol i’r Aelodau ar gyfer 2025/2026, yn amodol ar gynnwys unrhyw newidiadau y penderfyna’r Cyngor arnynt yn y cyfarfod hwn; ac

Awdurdodi’r Swyddog Arweiniol Corfforaethol: Gwasanaethau Democrataidd i gynnwys unrhyw newidiadau cyn cyhoeddi’r ddogfen ar ôl y Cyfarfod Blynyddol sydd i’w gynnal ar 16 Mai 2025.

Gadawodd y Cynghorwyr Bryan Davies, Endaf Edwards, Rhodri Evans, Chris James a John Roberts ac Eifion Evans, y Prif Weithredwr y cyfarfod yn ystod y trafodaethau.

Cyflwynodd y Cynghorydd Wyn Thomas yr adroddiad i'r Cyngor ar ran y Cynghorydd Bryan Davies a oedd wedi datgelu buddiant personol ac un sy’n rhagfarnu. Rhoddodd amlinelliad o'r Polisïau Cyflog Athrawon, gan nodi'r elfennau statudol y mae'n ofynnol eu gweithredu sy'n cynnwys cynnydd o 5.5% i'r holl bwyntiau cyflog a lwfansau statudol, gan nodi y bydd bob cynnydd mewn cyflog yn daladwy o’r 1af o Fedi 2024.

Amlinellodd hefyd y gwelliannau sy'n deillio o’r argymhellion gan Gorff Adolygu Cyflogau Annibynnol Cymru, a oedd yn cynnwys:

-        gofyniad i Gyrff Llywodraethu fod yn fodlon bod cyfrifoldebau cynaliadwy, ychwanegol sy’n ymwneud â thaliadau CAD1 “yn cynnwys cyfrifoldeb rheolwr llinell dros nifer sylweddol o bobl neu lefelau sylweddol o gyfrifoldeb ac atebolrwydd ychwanegol cyfwerth mewn meysydd allweddol yr ysgol”;

-        na ddylid dyfarnu lwfansau CAD3 fel arfer am fwy na 2 flynedd;

-        y bydd lwfansau CAD1 a CAD2 a ddyfarnwyd i athrawon rhan-amser yn cael eu talu'n llawn (‘will’ as opposed to ‘may’), gyda chytundeb yr athro rhan-amser a’r cyflogwr/corff llywodraethu os yw’r athro’n cyflawni’r holl ddyletswyddau sy’n gysylltiedig â’r lwfans yn llawn; a

-        chyflwyno "yn cynnwys cyfrifoldebau bugeiliol neu les a diogelu plant" fel cyfrifoldeb sylweddol a allai arwain at ddyfarnu CAD1 neu CAD2.

Yn dilyn pleidlais, PENDERFYNWYD yn unfrydol i gymeradwyo:

a)    Polisi Cyflogau enghreifftiol Ysgolion 2024/25 a’i gymeradwyo i’r Cyrff Llywodraethu er mwyn ei fabwysiadu yn ysgolion Ceredigion

b)    Polisi Cyflogau enghreifftiol Athrawon Digyswllt 2024/25 ar gyfer athrawon a gyflogir yn ganolog.

Gadawodd y Cynghorwyr Bryan Davies, Gareth Davies, Endaf Edwards, Wyn Evans a Keith Henson a’r holl Uwch Swyddogio y cyfarfod yn ystod y trafodaethau.

Cyflwynodd y Cynghorydd Wyn Thomas yr adroddiad i'r Cyngor ar ran y Cynghorydd Bryan Davies a oedd wedi datgelu buddiant personol ac un sy’n rhagfarnu. Rhoddodd grynodeb o'r adroddiad gan amlygu'r newidiadau a oedd wedi’u cytuno’n genedlaethol, gan nodi mai dim ond ym mis Chwefror 2025 y dechreuwyd ar y trafodaethau ar gyfer y dyfarniadau cyflog 2025/26. Nododd y canlynol: Bod y dyfarniad cyflog ar gyfer staff y Cyd-Gyngor Cenedlaethol wedi'i gytuno ar £1,290 wedi'i ychwanegu at bwyntiau 2 – 43 ar y golofn gyflog a 2.5% wedi'i ychwanegu at bwyntiau 44 – 53 ar y golofn gyflog; bod y dyfarniad cyflog cenedlaethol ar gyfer y Prif Weithredwr a'r Prif Swyddogion wedi cael ei gytuno ar 2.5% wedi'i ychwanegu at yr holl bwyntiau’r golofn gyflog; a bod y dyfarniadau cyflog cenedlaethol ar gyfer Pwyllgor Soulbury wedi'u cytuno ym mis Chwefror 2025 a'u bod wedi'u hôl-ddyddio i’r 1af o Fedi 2024 ar 2.5% wedi'u hychwanegu at yr holl bwyntiau a lwfansau’r golofn gyflog.

Yn dilyn pleidlais, PENDERFYNWYD yn unfrydol i gymeradwyo’r Polisi Cyflogau ar gyfer 2025/26.

Cyflwynodd y Cynghorydd Bryan Davies, Arweinydd y Cyngor ac Aelod Cabinet dros Wasanaethau Democrataidd, Polisi, Perfformiad a Phobl a Threfniadaeth yr adroddiad i'r Cyngor yn amlinellu'r newidiadau i gyfrifoldebau'r Cynghorwyr.

Diolchodd i’r Cynghorydd Keith Henson am y gwaith ardderchog a wnaeth wrth ymdrin â phortffolio eithriadol o heriol, gan ymateb i bryderon gan bob Aelod ar draws y Siambr, a chroesawodd y Cynghorydd Shelley Childs i'w rôl newydd. Ategwyd hyn gan y Cadeirydd, y Cynghorydd Marc Davies, Cadeirydd y Pwyllgor Trosolwg a Chraffu Cymunedau Ffyniannus, y Cynghorydd Elizabeth Evans a'r Cynghorydd Rhodri Evans.

Diolchodd y Cynghorydd Keith Evans i bawb am eu geiriau caredig, a diolchodd i Swyddogion o'r adran Priffyrdd a'r Gwasanaethau Amgylcheddol a'r grŵp Rheoli Carbon am eu gwaith caled yn sicrhau'r canlyniadau gorau i'r holl breswylwyr o dan amodau hynod o heriol.

Nododd Aelodau’r Cyngor y newidiadau canlynol, sy’n weithredol o 1 Ebrill 2025:

a)    Penodi'r Cynghorydd Shelley Childs yn Aelod Cabinet ar faterion Priffyrdd a Gwasanaethau Amgylcheddol;

b)    Trosglwyddo swyddogaeth portffolio Rheoli Carbon i bortffolio'r Economi, Adfywio a Rheoli Carbon;

c)     Penodi'r Cynghorydd Keith Henson yn Aelod o'r Pwyllgorau canlynol

i.                  Pwyllgor Trwyddedu

ii.                Pwyllgor Trosolwg a Chraffu Cymunedau Ffyniannus.

d)    Penodi’r Cynghorydd Eryl Evans fel Eiriolydd Bioamrywiaeth.

Cynigiodd y Cynghorydd Bryan Davies ac eiliwyd gan y Cynghorydd Catrin M S Davies bod y Cynghorydd Ann Bowen Morgan yn cael ei hethol yn Gadeirydd y Cyngor ar gyfer y flwyddyn fwrdeistrefol nesaf.

PENDERFYNWYD yn unfrydol bod y Cynghorydd Ann Bowen Morgan yn cael ei hethol yn Gadeirydd Etholedig y Cyngor ar gyfer 2025/26 i’w sefydlu yn y Cyfarfod Blynyddol a gynhelir am 2.00pm ar ddydd Gwener, 16 Mai 2025.

Cynigiodd y Cynghorydd Elizabeth Evans ac eiliwyd gan y Cynghorydd Meirion Davies bod y Cynghorydd John Roberts yn cael ei ethol yn Is-Gadeirydd Etholedig y Cyngor ar gyfer y flwyddyn fwrdeistrefol nesaf.

PENDERFYNWYD yn unfrydol bod y Cynghorydd John Roberts yn cael ei ethol yn Is-gadeirydd Etholedig y Cyngor ar gyfer 2025/26 i’w sefydlu yn y Cyfarfod Blynyddol a gynhelir am 2.00pm ar ddydd Gwener, 16 Mai 2025.