Agenda a Chofnodion

Ymddiheurodd y Cynghorwyr Rhodri Davies, Endaf Edwards a Mark Strong am na fedrent fod yn bresennol yn y cyfarfod.

Gan fod y Cadeirydd, y Cynghorydd Endaf Edwards, yn absennol, cadeiriwyd y cyfarfod gan yr is-gadeirydd, y Cynghorydd Chris James.

Datgelodd Cathryn Charnell White fuddiant personol o ran eitem 3 ar yr agenda.

Ystyriwyd Adroddiad Trosolwg y Bartneriaeth Sgiliau Rhanbarthol 2021-2022 yn fanwl. Cyflwynwyd yr adroddiad er mwyn rhoi trosolwg a diweddariad i Aelodau’r Pwyllgor ar gynnydd Partneriaeth Sgiliau Rhanbarthol Canolbarth Cymru.

Yn dilyn cwestiynau o’r llawr, CYTUNWYD nodi’r adroddiad er gwybodaeth.

Ystyriwyd y canlyniadau TGAU a Lefel A 2022 a gyflwynwyd i’r Pwyllgor er tryloywder. Adroddwyd o ganlyniad i bandemig Covid-19, ni chynhaliwyd arholiadau allanol yn eu dull traddodiadol yn ystod 2020 na 2021.

Penderfynwyd y byddai arholiadau allanol yn cael eu cynnal yn ystod Haf 2022, a chyflwynwyd rhai addasiadau megis lleihau’r cynnwys mewn rhai pynciau.

Penderfynwyd gan Gymwysterau Cymru y byddai canlyniadau ar lefel genedlaethol yn adlewyrchu pwynt hanner ffordd yn fras rhwng canlyniadau haf 2019 a haf 2021. I’r perwyl hwnnw, nid oedd modd cymharu canlyniadau 2022 gyda blynyddoedd blaenorol. Cyflwynwyd canlyniadau dros dro ar gyfer Ceredigion (bydd y data swyddogol ar gael ddechrau mis Hydref).

CYTUNWYD nodi cynnwys yr adroddiad er gwybodaeth a llongyfarch y disgyblion, yr athrawon a’r staff ar y canlyniadau gwych hyn yn dilyn y pandemig.

Ystyriwyd Canllawiau Gwella Ysgolion Llywodraeth Cymru. Cyflwynwyd yr adroddiad i’r Pwyllgor er mwyn rhannu gwybodaeth am ddogfen allweddol parthed Gwella Ysgolion a fydd â goblygiadau o ran sut mae’r Gwasanaeth Gwella Ysgolion yn cael ei weithredu yng Ngheredigion.

Adroddwyd yn dilyn ymgynghoriad cenedlaethol a ddaeth i ben ar 15 Mawrth 2021, cyhoeddwyd dogfen ganllaw o’r enw Fframwaith Gwella Ysgolion Llywodraeth Cymru, ac mae’r ddogfen hon bellach yn weithredol ers mis Medi 2022. Bydd y ddogfen yn statudol o fis Medi 2024. Nod y ddogfen yw;

· Cryfhau effeithiolrwydd hunanwerthuso a gwella cynllunio o fewn ysgolion.

 · Rhoi’r gorau i ddefnyddio’r system genedlaethol ar gyfer categoreiddio ysgolion a rhoi system gymorth debyg yn ei lle heb gyhoeddi categorïau ysgol

· Cryfhau a darparu eglurder ynghylch y gwahanu rhwng gweithgareddau gwerthuso / gwella a’r system atebolrwydd

· Neilltuo rolau a chyfrifoldebau gwahanol gyrff yn glir mewn system hunan-wella

Mae’r canllawiau yn gosod yr hyn y mae’n rhaid i ysgolion ac eraill yn y system addysg ei wneud a’r hyn y dylai ysgolion ac eraill ei wneud o dan y fframwaith ar gyfer gwerthuso, gwella ac atebolrwydd. Mae rhwymedigaeth statudol y tu ôl i’r cyfeiriadau at yr hyn y mae’n ‘rhaid’ i ysgolion ac eraill ei wneud. Arfer gorau, yn unol â’r canllawiau, yw’r gweithrediadau hynny a nodir fel yr hyn y ‘dylai’ ysgolion ac eraill ei wneud. Drwy gyhoeddi canllawiau gwella ysgolion ar sail anstatudol nawr, rydym am i ysgolion, awdurdodau lleol, consortia rhanbarthol, Estyn ac awdurdodau esgobaethol weithredu a phrofi’r dulliau gwella ysgolion ac atebolrwydd sy’n cael eu nodi ynddynt. Byddant wedyn yn gwerthuso eu heffaith. Ar ôl hynny, rydym yn bwriadu diweddaru’r canllawiau, gan adeiladu ar ddysgu yn 2022 i 2023 a 2023 i 2024 a’u cyhoeddi ar ffurf canllawiau statudol a fydd yn dod i rym ym mis Medi 2024.

Yna amlinellwyd rhestr o’r prif negeseuon i’r Aelodau.

CYTUNWYD nodi’r adroddiad er gwybodaeth.

CYTUNWYD nodi’r wybodaeth a gyflwynwyd a bod yr adroddiadau’n gadarnhaol iawn. Estynnwyd llongyfarchiadau i’r holl ysgolion ar eu cyflawniadau.

Adroddwyd bod y wasg wedi canolbwyntio ar un argymhelliad yn adroddiad Ysgol Penglais; ac nid yr adroddiad yn ei gyfanrwydd a oedd yn un cadarnhaol, gydag Estyn yn gofyn am ddwy astudiaeth achos o arfer ardderchog gan yr ysgol.

CYTUNWYD nodi’r Flaenraglen Waith ddrafft fel y’i cyflwynwyd yn amodol ar y canlynol: -

• Bod y Ffrwd Waith Ecwiti yn ymweld â HCT.
• Bod Polisi Drafft ar Addysg Cydberthynas a Rhywioldeb yn cael ei gyflwyno yng nghyfarfod mis Rhagfyr.
• Bod diweddariad ar yr adolygiad o addysg ôl-16 yn cael ei gyflwyno yng nghyfarfod mis Chwefror.
• Ffrwd waith yn ystyried yr adborth gan ysgolion ar y gwahanol agweddau ar eu taith wella yn dilyn arolygiadau.
• Adroddiad ar Awtistiaeth a’r angen i leihau’r amser sydd ei angen ar y Bwrdd Iechyd i asesu plant a’r ddarpariaeth ar gyfer awtistiaeth o fewn y sir.
• Bod diweddariad ar y grantiau sydd ar gael i ysgolion yn cael ei gyflwyno yng nghyfarfod mis Rhagfyr cyn pennu’r gyllideb ym mis Chwefror.
• Yr angen i egluro bod y Panel Asedau yn parhau i neilltuo arian a geir drwy werthu hen adeiladau ysgol i’r gyllideb addysg.
•  

CYTUNWYD cadarnhau bod Cofnodion cyfarfod blaenorol y pwyllgor yn rhai cywir.