Agenda a chofnodion drafft

i.       Ymddiheurodd y Cynghorwyr Ceris Jones (Cadeirydd) a Mark Strong am nad oeddent yn gallu bod yn bresennol yn y cyfarfod.

ii.      Ymddiheurodd y Cynghorydd Alun Williams, Aelod Cabinet ar gyfer Gydol Oes a Llesiant am nad oedd yn gallu bod yn bresennol yn y cyfarfod.

iii.    Estynnwyd llongyfarchiadau i’r Cynghorydd Ceris Jones (Cadeirydd) ar enedigaeth ei mab.   

Ni ddatgelodd yr un Aelod o’r Pwyllgor fuddiant personol na buddiant a oedd yn rhagfarnu (nac ychwaith unrhyw ddatganiadau chwipio).

Rhoddwyd ystyriaeth i’r adroddiad ar Ganolfan Lles Aberteifi yn dilyn ymweliad y Pwyllgor â safle Pwll Coffa Aberteifi / Maes Parcio Cae Ffair, a Chanolfan Hamdden Teifi ar 24 Hydref 2024.

Cafodd yr aelodau gyfle i ofyn cwestiynau a gafodd eu hateb gan y Swyddogion a’r Cynghorydd Catrin M S Davies. Dyma'r prif bwyntiau a godwyd:

·       Roedd yr Aelodau yn ddiolchgar o’r cyfle i ymweld â Phwll a Neuadd Goffa Aberteifi / Maes Parcio Cae Ffair, a Chanolfan Hamdden Teifi a gwnaethant ddiolch i’r Swyddogion am eu hamser.

·       Roedd mynediad yn ffactor allweddol wrth ystyried beth oedd yn cael ei ddiffinio fel canol y dref. Nodwyd nad oedd trafnidiaeth gyhoeddus yn gwasanaethu Canolfan Hamdden Teifi yn uniongyrchol ac roedd mynediad ychydig yn fwy o her. Roedd llawer o’r Aelodau o’r farn fod Pwll a Neuadd Goffa Aberteifi / Maes Parcio Cae Ffair yng nghanol y dref ac y dylent fanteisio ar y cyfleoedd i’r ardal.

·       Nodwyd, pe bai Pwll a Neuadd Goffa Aberteifi / Maes Parcio Cae Ffair yn cael ei gymeradwyo fel y safle a ffafrir, y byddai gofyn cynllunio’n ofalus a chydweithio i hwyluso’r gwaith o achos bod yr ysgol gerllaw, bod y maes parcio yn cael ei ddefnyddio wrth ollwng a chasglu’r disgyblion, ac o achos y ffair flynyddol.

·       Mynegwyd pryderon ynghylch colli 60 o leoedd parcio ym Maes Parcio Cae Ffair gan fod hynny’n achosi anhawster adeg gollwng/ casglu o’r ysgol a darparu lleoedd parcio hygyrch. Nodwyd bod y ffigwr hwn yn seiliedig ar y cynlluniau gwreiddiol o hyd at 300²m o arwynebedd llawr ac y byddai hyn yn rhan o'r ystyriaethau ehangach.

·       Er nad oedd cyllid ar gael ar hyn o bryd, byddai mandad gwleidyddol yn adlewyrchu ymrwymiad y Cyngor i ddatblygu Canolfan Lles yn Aberteifi pan fyddai’r cyfle yn codi.

·       Bydd cyfleoedd yn hwyrach yn y broses i benderfynu ar ba gyfleusterau fyddai'n cael eu cynnig yn y Ganolfan Lles. Byddai'r pwyslais ar ddarparu cymorth iechyd a lles i deuluoedd mewn angen.

·       Nodwyd nad oedd yr awdurdod lleol wedi bod ynghlwm wrth redeg Pwll a Neuadd Goffa Aberteifi yn y gorffennol. Unwaith byddai’r cyfleuster yn cael ei drosglwyddo i berchnogaeth y Cyngor ar 1 Hydref 2024, nid oedd ganddynt fwriad i'w ailagor oherwydd pwysau ariannol parhaus, fodd bynnag, roeddent yn agored i dderbyn achos busnes hyfyw oddi wrth y gymuned.

CYTUNWYD i argymell y canlynol i'r Cabinet:

1.     Mai safle Pwll Coffa Aberteifi/ Maes Parcio Cae Ffair yw’r un a ffafrir ar gyfer datblygu’r Ganolfan Lles, yn seiliedig ar opsiwn B yn yr astudiaeth ddichonoldeb; yn amodol ar leihau ôl troed y ganolfan er mwyn peidio â cholli cymaint o fannau parcio.

2.     Mai adeiladu o’r newydd ar safle Pwll Coffa Aberteifi/ Maes Parcio Cae Ffair yw’r opsiwn a ffafrir.