Ymddiheurodd y Cynghorydd Marc Davies am na fedrai ddod i'r cyfarfod.

Hefyd, ymddiheurodd y Cynghorydd Mark Strong am na fedrai ymuno â’r cyfarfod gan ei fod yn cael trafferthion cysylltu â Zoom.

Ni ddatgelwyd dim buddiannau personol na buddiannau a oedd yn rhagfarnu.

Croesawodd y Cadeirydd Diana Davies, Lynne Walters a Hazel Lloyd Lubran i’r cyfarfod i roi’r adroddiad fel y gallai Aelodau’r Pwyllgor gael y cyfle i graffu ar y penderfyniadau a’r camau gweithredu a wnaed gan Fwrdd Gwasanaethau Cyhoeddus Ceredigion.  

Bu i Lynne Walters gyflwyno’r wybodaeth gan gyfeirio’n benodol at y gwaith a wnaed yn ystod chwarter olaf 2020 o ran adolygu aelodaeth a blaenoriaethau pob Grŵp Prosiect.  Dywedodd fod pump o’r Grwpiau Prosiect wedi cytuno ar flaenoriaethau a chynlluniau gweithredu newydd a oedd yn canolbwyntio ar weithredu yng ngoleuni COVID.

Yn unol â chais y Pwyllgor hwn yn ei gyfarfod ym mis Ionawr, rhoddodd Hazel Lloyd Lubran, Cadeirydd Grŵp Prosiect Deall Ein Cymunedau ddiweddariad am y cynnydd yr oedd y grŵp wedi’i wneud. Rhoddodd grynodeb byr o’r gwaith a wnaed yn ystod pandemig COVID-19. Soniodd yn benodol am y cyfathrebu rhagorol sydd wedi digwydd ac sy'n parhau i ddigwydd gyda'r rhwydwaith o grwpiau cymorth lleol a oedd wedi’u sefydlu. Dywedodd hefyd fod y cyfathrebu parhaus rhwng sefydliadau'r sector cyhoeddus a'r sector preifat wedi bod yn amhrisiadwy yn ystod yr argyfwng. 

Ar ôl hynny, cafodd yr Aelodau’r cyfle i ofyn cwestiynau i’r Swyddogion a oedd yn bresennol. Bu i lawer o'r Aelodau ganmol y gwaith a wnaed yn eu trefi a'u cymunedau yn ystod yr argyfwng gan nodi’r ysbryd tîm rhagorol a ddangoswyd.

Diolchodd y Cadeirydd i'r Swyddogion am eu cyflwyniadau a dywedodd wrth Aelodau'r Pwyllgor y byddai cynrychiolydd o bob un o'r grwpiau yn cael y cyfle i ddod i gyfarfodydd yn y dyfodol i roi cyflwyniadau.

Ar ôl trafodaeth, gofynnwyd i’r Aelodau ystyried yr argymhellion canlynol:

ARGYMHELLION:

i.              Derbyn cofnodion cyfarfod Bwrdd Gwasanaethau Cyhoeddus Ceredigion a gynhaliwyd ar 22 Chwefror 2021 a chofnodion drafft cyfarfod Bwrdd Gwasanaethau Cyhoeddus Ceredigion a gynhaliwyd ar 26 Ebrill 2021;

ii.            Derbyn yr adroddiad mwyaf diweddar ynglŷn â Grwpiau Prosiect y BGC, fel y’i cyflwynwyd i’r BGC;

iii.           Derbyn adroddiad ffocws ar waith Grŵp Prosiect Deall ein Cymunedau; a;

iv.           Derbyn braslun o Adroddiad Blynyddol Cynllun Llesiant Lleol Ceredigion 2020-21. 

Cytunodd Aelodau’r Pwyllgor i dderbyn yr argymhellion fel y’u nodwyd 

uchod fel y gallai’r Pwyllgor Cydlynu Trosolwg a Chraffu gyflawni

ei rôl o gadw golwg ar effeithiolrwydd cyffredinol y Bwrdd Gwasanaethau Cyhoeddus.

Croesawodd y Cadeirydd Siân Howys i’r cyfarfod i roi Crynodeb Gweithredol o’r Adroddiad CYSUR/CWMPAS.  

Yn dilyn cwestiynau, cytunodd Aelodau'r Pwyllgor y dylid anfon neges i staff y Gwasanaethau Cymdeithasol i'w canmol am eu gwaith caled a'u hymrwymiad yn ystod argyfwng COVID. Cytunodd Ms Howys y byddai’n cyfleu’r neges hon i’w chydweithwyr.  

CYTUNODD Aelodau’r Pwyllgor i nodi cynnwys yr adroddiad a'r lefel o weithgarwch o fewn yr Awdurdod Lleol fel bod trefniadau llywodraethu gweithgarwch yr Awdurdod Lleol ac asiantaethau sy’n bartneriaid yn cael eu monitro.

       Croesawyd Elin Prysor a Hannah Rees i gyflwyno’r adroddiad am Gofnod Penderfyniadau Grŵp Rheoli Aur COVID-19. Cyflwynodd Hannah Rees yr adroddiad gan roi gwybodaeth am benderfyniadau Grŵp Arweiniol Covid-19 (y Grŵp Rheoli Aur) yn ystod y cyfarfodydd a gynhaliwyd rhwng 1 Rhagfyr 2020 a 29 Ebrill 2021.

       Yn dilyn trafodaeth, gofynnwyd i Aelodau’r Pwyllgor nodi cynnwys yr adroddiad a chynnwys Cyfarfodydd Grŵp Rheoli Aur Covid-19 yn unol â’r Cofnod Penderfyniadau a oedd wedi’i gynnwys gyda phapurau’r agenda.

CYTUNODD yr Aelodau i dderbyn a nodi’r adroddiad er gwybodaeth. Drwy wneud hyn, gellid monitro’r modd y mae trefniadau gwneud penderfyniadau’r Cyngor yn cael ei lywodraethu ar ôl i’r trefniadau hynny gael eu haddasu.

Bu i’r Cynghorydd Ivor Williams gynnig y dylid cadarnhau Cofnodion cyfarfodydd y Pwyllgor Cydlynu a gynhaliwyd ar 11 Chwefror 2021 a 18 Mawrth 2021 yn rhai cywir ac eiliwyd y cynnig hwn gan y Cynghorydd Lyndon Lloyd MBE.  Nid oedd dim materion yn codi o'r cofnodion. 

Bu i Gadeirydd pob Pwyllgor neu’r Is-gadeirydd yn absenoldeb y Cadeirydd, neu’r Swyddog Craffu os oedd y ddau yn absennol, ddarparu gwybodaeth yn eu tro am y Pwyllgorau trosolwg a chraffu perthnasol.   

       Yn dilyn trafodaeth, cytunwyd y byddai’r canlynol yn cael eu cynnwys ar Flaenraglenni Gwaith y Pwyllgorau canlynol fel eitemau i’w hystyried yn y dyfodol:

·         Adnoddau Corfforaethol - Gwasanaethau CLIC

·         Cymunedau Iachach – Effaith y defnydd o gyffuriau ledled y Sir (gan gynnwys sefydliadau addysg). Byddai Aelodau’r Pwyllgor Cymunedau sy’n Dysgu yn cael eu gwahodd i fod yn bresennol pan fyddai’r eitem hon yn cael ei hystyried.

Ni chodwyd dim materion eraill.

       Diolchodd y Cynghorydd Rowland Rees-Evans i Aelodau’r Pwyllgor am

       ddod i’r cyfarfod ac i’r swyddogion am gyflwyno’r wybodaeth mewn

       ffordd gryno. Diolchodd hefyd i dîm y Gwasanaethau Democrataidd  

       a’r Cyfieithwyr am sicrhau bod y cyfarfod wedi’i gynnal yn hwylus.