Agenda a Chofnodion

Dim.

Dim.

Rhoddodd Dr Sarah Groves-Phillips grynodeb o’r adroddiad a gyflwynwyd ynghylch cynllunio a ffosffadau a rhoddodd Mrs Kelly Jordan, Rheolwr Cyswllt Ansawdd Afonydd (Asedau Dŵr Gwastraff) a Mr Ryan Norman, Rheolwr Twf (Datblygu) gyflwyniad PwyntPŵer am eu gwaith o ran y mater hwn. Darparwyd y wybodaeth ganlynol:-

• Trosolwg – Cynlluniau Buddsoddi a Rhaglenni Ymchwilio Dŵr Cymru
• Asesiad o’r Perfformiad Amgylcheddol
• Ffosfforws – yr hyn y mae Dŵr Cymru wedi’i wneud hyd yma
• Ffosfforws mewn Ardal Gadwraeth Arbennig
• Deall ffynonellau ffosfforws yn Afon Teifi
• Ffosfforws – beth am AMP7 a thu hwnt i hynny?
• Cyfathrebu â’n rhanddeiliaid  - yr hyn yr ydym wedi’i wneud hyd yma
• Gwasanaethau Datblygwyr a’r broses gynllunio
• Asesiadau o ran ymgynghoriadau cynllunio
• Adolygiadau Cyfoeth Naturiol Cymru o’r broses drwyddedau – y camau nesaf
• Yr ymateb cynllunio yn dilyn adolygiad Cyfoeth Naturiol Cymru o’r trwyddedau
• Cydweithio a Rhannu Gwybodaeth
• Deall ein hasedau- gorlif storm
• Y ffordd y mae’r gorlif carthffosiaeth gyfun yn gweithio.
• Deall ein hasedau

Yn dilyn cwestiynau gan yr Aelodau am faterion o fewn wardiau penodol ac esboniad am y materion a godwyd yn y cyflwyniad, CYTUNWYD y dylid nodi’r sefyllfa bresennol ac y byddai dyddiadau unrhyw waith y byddai Dŵr Cymru yn ei wneud yn y Sir yn y dyfodol yn cael eu hanfon at y Cynghorwyr er gwybodaeth.

Rhoddodd Mr Phil Jones, Rheolwr Corfforaethol, Gwasanaethau Priffyrdd gyflwyniad manwl i’r Aelodau am Wasanaeth y Gaeaf gan gynnwys y materion canlynol:-

• Y sefyllfa gyfreithiol
• Y gwasanaeth a ddarperir ar hyn o bryd
• Y bwriad i leihau cyllideb y gwasanaeth cynnal a chadw dros y gaeaf
• Yr opsiynau sydd ar gael ar gyfer y dyfodol

Cododd yr Aelodau bryderon ynghylch y ffyrdd nad oeddynt yn cael eu graeanu yn eu Wardiau. Serch hynny, yn unol â’r protocolau asesu (y matrics), roedd pob un o ffyrdd y Sir wedi’u sgorio’n wrthrychol ac roedd y sgoriau hyn wedi’u cadarnhau gan ail swyddog. Roedd materion megis a oedd y ffordd yn agos at ysgol neu ar lwybr bysiau, ac ati, hefyd yn cael eu hystyried. Awgrymwyd y dylai’r Aelodau dderbyn gwybodaeth am sgoriau’r ffyrdd nad oeddynt yn cael eu graeanu fel y gallent roi gwybod i’w trigolion am benderfyniadau’r Cyngor.

Yn dilyn eglurhad ynghylch y materion a godwyd yn y cyflwyniad a thrafodaeth ynghylch dulliau eraill o raeanu gan gynnwys halen craig a gofyn i ffermwyr gynorthwyo yn ystod tywydd gwael, CYTUNWYD y dylai’r swyddogion gynnal adolygiad cynhwysfawr o Wasanaeth y Gaeaf yn barod ar gyfer gaeaf 2024/25.

Cyflwynodd y Cynghorydd Keith Henson yr eitem ynghylch y cynnig i roi 2 awr o barcio am ddim cyn 11am ym Meysydd Parcio Talu ac Arddangos y Cyngor a rhoddodd Mr Gerwyn Jones, Rheolwr Corfforaethol, Gwasanaethau Amgylcheddol gyflwyniad i’r aelodau. Darparwyd y wybodaeth ganlynol:-

• Y cefndir
• Proffil y tocynnau
• Yr ystyriaethau
• Yr effaith ariannol
• Yr hyn sydd i’w ystyried a’r opsiynau

Cyflwynodd y Cynghorydd Ann Bowen Morgan gynnig am 2 awr o barcio am ddim ym meysydd parcio’r Cwmins a’r Rwceri yn Llanbedr Pont Steffan gan y byddai hyn, yn ei barn hi, yn cefnogi busnesau ac yn annog twristiaid i ymweld â’r dref. Fel rhan o broses pennu’r gyllideb ar gyfer 2023/24, roedd yr Aelodau wedi cytuno ar flwyddyn arall o barcio am ddim ym meysydd parcio talu ac arddangos Tregaron a Llandysul. Cyfrannodd Aelodau eraill at y drafodaeth am y cynnig a gyflwynwyd a rhannodd y Cynghorwyr Elizabeth Evans, Sian Maeherlin ac Elaine Evans eu barn â’r Pwyllgor ynglŷn â pharcio am ddim yn y meysydd parcio yn eu wardiau.

CYTUNWYD felly i argymell y dylai’r Cabinet:-

(i) ystyried cynnal adolygiad ynghylch codi tâl am barcio ar hyd y Promenâd yn Aberystwyth; ac

(ii) ystyried cynnig 2 awr o barcio am ddim rhwng 8am a 10am, o ddydd Llun i ddydd Gwener, mewn un maes parcio ym mhob un o drefi Llanbedr Pont Steffan, Aberaeron ac Aberteifi

Cytunwyd i gadarnhau cofnodion y cyfarfod a gynhaliwyd ar 22 Mehefin 2023.

Materion yn codi:

Dim.

Cytunwyd i nodi cynnwys y Flaenraglen Waith a gyflwynwyd yn amodol ar nodi y gallai’r canlynol gael eu hystyried yng nghyfarfodydd y dyfodol:-

• Effaith cynlluniau a ariennir gan grantiau – beth yw’r effaith, pa mor dda mae arian yn cael ei dynnu i lawr
• Y defnydd a wneir o adeiladau
• Y Polisi Torri Porfa
• Y berthynas rhwng Cyngor Sir Ceredigion a Llywodraeth Cymru o ran Cynllunio Gwlad a Thref
• Cymorth i Fusnesau ac Adfywio